Год: 2024
Выдаўца: Medieval Prophecy Records
Рэйтынг: 7,7 / 10
Нагадваю, што PAMORAK – гэта другі гурт удзельнікаў NIAISNY, у якім, як прызнаўся адзін зь іх у прыватнай размове, яны паспрабавалі награць нешта ў стылі старых DEATHSPELL OMEGA. Як і ў выпадку з першым дэма NIAISNY, натхнёным рэлізамі Blaze Birth Hall, амаль нічога ў гэтым дачыненьні не атрымалася. Адзіны рэліз, сапраўды падобны да DEATHSPELL OMEGA, запісаў трэці гурт удзельнікаў NIAISNY, старэйшы за два вышэйузгаданых, але пра яго зараз ня буду.
Так ці так, усё гэта насамрэч няблага. Ісьці па сьлядох іншых гуртоў варта тады, калі з уласным стылем цяжкавата, а ў нашых ананімных герояў гэтай праблемы якраз няма. Характэрная хваравітая мэлёдыка гітар пазнаецца адразу ж пасьля вельмі кінематаграфічнага ўступнага трэку, на якім пад туманны эмбіент гучаць акустычная гітара і дудук (я ўдакладняў!). PAMORAK адрозьніваецца ад NIAISNY збольшага сваёй агрэсіяй і напорам: замест насычаных рыфаў і выразнага басу тут шалёныя трэмола пад бласт-біты. У абагуленым Black Metal-гучаньні гэта сапраўды б нагадвала старых DEATHSPELL OMEGA ці яшчэ будзь-які клясычны гурт, але адметная крыўская духоўнасьць надае музыцы зусім іншы характар, больш летуценны і эмацыйны. Нават калі б PAMORAK быў строга пра пакланеньне Шатану (а гэта, нягледзячы на адсутнасьць тэкстаў на ўкладцы, не так), гэтая музыка не натхняе на тое, каб сраць і канчаць на імя Казла. Ёй уласьцівая, не пабаюся гэтых словаў, інтэлектуальная эпічнасьць. Хоць гэта дэма на 20 хвілін, тут ёсьць што паслухаць і пра што падумаць.
Рэліз выйшаў маленькім накладам толькі на касэтах з вельмі просценькай укладкай. Вокладку зрабіла Zabrava, бельгійская басістка адразу ўсіх гуртоў ініцыятывы Ancient Hounds Circle (CRYPTS OF WALLACHIA, ORKBLUT і г.д.). На Medieval Prophecy наклад ужо распраданы, але нешта яшчэ можна знайсьці па розных эўрапейскіх дыстра.
Крыўская 
English (UK)