103-і выпуск кароткіх аглядаў.
BLESTEMAT – Poisonous Metal
Год: 2024
Выдаўца: Silent Future Recordings
Рэйтынг: 6,66 / 10
Дэбютны EP Black Metal-гурта з Швэцыі, заяўлены як працяг справы артадаксальных гуртоў кшталту OFERMOD, MALIGN, WATAIN. Агульныя рысы сапраўды ё, але BLESTEMAT на тле гігантаў жанру гучыць зусім неглыбока, дзесьці на ўзроўні горшых запісаў BEHEXEN. Пра тэкставы складнік па маім прома сказаць нешта цяжка, аднак і там, здаецца, няма нічога выбітнага.
CRYPTIC SHIFT – Return to Realms
Год: 2024
Выдаўца: Blood Harvest
Рэйтынг: 6 / 10
Перавыданьне EP 2016-га году з бонус-трэкамі. Гурт паходзіць з Англіі і грае тэхнічны навукова-фантастычны трэш-дэт у стылі ўсіх банд, якія адразу прыходзяць вам на розум: NOCTURNUS, BLOOD INCANTATION, VOIVOD, TIMEGHOUL etc. У гэтым стылі музыкі можна ствараць сапраўдныя цуды, калі гурт мае вельмі добры густ, умее выбітна граць і задаваць належную атмасфэру. CRYPTIC SHIFT прынамсі на 2016-ы год былі яшчэ не там; граюць яны тэхнічна, але з густам, атмасфэрай і нават якасьцю гука назіраюцца праблемы. Жаданьня высьвятліць, што гэтыя ангельцы запісалі на паўнафарматным альбоме, пасьля “Return to Realms” я не адчуў.
SPEEDKILLER – Inferno
Год: 2024
Выдаўца: Helldprod Records
Рэйтынг: 7,5 / 10
Першы альбом юнага бразільскага гурта. У лепшых традыцыях Helldprod, выйшаў накладам у 50 касэт, як быццам гэта нейкае гаўнянае дэма. Тым часам, “Inferno” хай і не прапануе нічога новага, але зьмяшчае 37 хвілін выдатна награнага, густога Speed Thrash Black Metal з магутным натуральным гукам і сталымі партыямі лід-гітары. Рэкамэндую тым, хто ведае такія імёны, як VOMIT OF DOOM, GRAVE DESECRATOR, KRUSHHAMMER.
DEMONIZED – Abyss Vanguard
Год: 2023
Выдаўца: Osmose Productions
Рэйтынг: 7,5 / 10
Новы міні-альбом мэксіканскага пражэкта, які да таго маўчаў 20 гадоў. Адметнай асаблівасьцю DEMONIZED ёсьць наяўнасьць у складзе легендарнага Джына Палубіцкага. Нават калі б я пра гэта не сказаў, вы б усё адно адразу пазналі ягоныя рыфы ў стылі ANGELCORPSE і PERDITION TEMPLE. Магутны, ваяўнічы рэліз, абавязковы для тых, хто любіць банды Джына!
UNPURE – Prophecies Ablaze
Год: 2023
Выдаўца: Invictus Productions
Рэйтынг: 5,8 / 10
Першы за 19 (!) гадоў альбом культавых швэдаў UNPURE я слухаў з чыстымі думкамі і сэрцам, бо раней я ня чуў аніводнай іхнай песьні. Маю вам сказаць, што “Prophecies Ablaze” мяне калі й ўразіў, то непрыемна. Аддаю належнае, гэта вельмі мэталічны мэтал, заліты тэстастэронам па самае вечка, але нейкі неймаверна бязглузды, залішаны мэты і адметнага стылю. Усё грукоча, дзяўбе і рычыць, а навошта – халера яго ведае. Паслухаўшы “Prophecies Ablaze” некалькі разоў, я адчуваю сябе дурнейшым, чым быў раней, і гэта адзіная выснова, якую я магу тут зрабіць.
Крыўская 
English (UK)